Kamunggay

Dili pwede mokaon ug kamunggay ang namatyan? Ngano kaha?

Diin man ni siya dapita nasulat sa Bibliya?

Silpon

Sa bag-o pa ang silpon sa akong mama, samot kaayu sige'g tawag nako. Mahurot nalang ang load sige'g tawag nako kung unsaon kuno pagbasa sa iyang text.

Pagkahurot sa iyang load. Naguol siya kay abi niya'g naguba iyang silpon. Unsaon man kuno niya pagcheck sa operator services nga wa man siya kahibalo kung unsay number sa operator? Dili man kuno 109 ang operator sama sa pLDT

Noodles ug SkyFlakes

Ingon akong amiga, aron maniwang ka'g dali, kaon ug noodles ug skyflakes lang. Ug tubig. Way karne, utan, softdrinks, kape ug bisan unsa nga naay kamay. Noodles ug skyflakes ra. Period.

Good luck sa imong kabuhi!

High Heels

Naa ko nakit-an sa Ayala. Mubo nga babaye mao tingali taas kaayu ug tikud. Naluoy tawon ko ka pirting paningkamot. Natakilpo bitaw na siya. Maayu nalang nindot pagka-recover.

Matud pa sa akong ig-agaw: Ngano bitaw nga ni-enter.

X-Men

Kada Byernes sa gabii, magpuyo jud mi sauna kay salida na mga cartoons. Ninja turtles ug X-men jud ang kinanindutan sauna. mag-ilog mi sauna kung kinsa kuno si Storm. Unya kay kinamagulangan man ko, ako nidaug sa lalis. hehe.

Maalaala

Natingala jud ko sauna nganong sikat ning salidaha. Nga puro man hilak-hilak ug sagpa-sagpa. Unya nakakita ko kausa lahos-lahos jud. Nindot man diay tinuora.

champorado

Kinsa kahay nakahunahuna nga butangan ug tabliya ang linugaw aron mahimong champorado?

ug ang mas sako nga pangutana, kinsay nakahunahuna nga parisan ug bulad ang champorado?

kinsa man gani to, bright jud! maayung pakpakan.

-

Ang ig-agaw sa akong amiga namalikas. Gikasab-an sa iyang mama. Nitubag pod ang bata:

Ngano lagi ikaw kung makasala ko, mu-ingon lagi ka'g pisti?

Lion-Tiger

Pirmi mi suguon sa akong lola palit ug katol sa iskina. Lion-Tiger katol adto palit sa ka Carmen.

Naglibog jud ko nganong Lion-Tiger ang brand. Mopatay ba diay ug lamok nang lion ug tigre? Frog unta to! Mokaon gud ug lamok ang baki!

Sikaran ang Bag-ang

Akong amiga sauna may pagkachismosa. Usa ka adlaw samtang nanglibak siya sa among silingan, gibaharan siya sa iyang papa nga sikaran iyang bag-ang kung dili mag-usab iyang batasan.

Nagbinuotan lagi balig usa jud ka semana.

Ang Adlaw

Ngano moputi man ang mga sinina kung iladlad sa adlaw, pero ang tawo mulagom man?