Kompyuter

Usa ka adlaw akong gitudluan akong mama unsaon paggamit ug Microsoft Excel. Kay maayu man ni gamiton kung magkwinta ug mga grado ug ranking ug uban pang mga buhaton sa Maistra.

"O, sige na nakasabot na ko", ingon akong mama.

Nilakaw na ko. Kini laging gadali ug laag. Moadto mi sa pier uban akong amiga kay pahangin kuno. Pero sa tinuod lang, people-watching diay to. Mao ra baya nang hangina sa pier ug sa tugkaran namo kay duol ra man among balay sa pier. hehehe..

Diha na jud ko sa gate, gitawag na sad ko.

"Balik sa Na kay nakalimot ko unsaon to!"

Gitudluan na sad nako kung unsaon. Kasabot na kuno siya.

Nidagan na jud ko padulong sa gawas. "Day!!! Balik sa, kay nawala tanan nakong gitype!"


..... Sauna ra to. Karon suhito na akong mama magkumpyuter. Akong gihatag niya akong daan nga kumpyuter, maayu nalang moderno pod siya gamay. Bisan kung magtype, mura gihapon gadukduk ug makinilya.

Bugasok Falls

Puslan man nga wa ko'y lingaw karon diri sa akong opisina, maghisgot ko's Bugasok Falls. Mao ni kinanindotan nga falls sa Argao, Cebu. Kahibalo mo ana? Kung wala mo kasuhito, adto dayon mo! Nindota lagi!!!!

Dili tugnaw ang tubig, sakto ra jud. Unya kinahanglan pod isog-isog ka'g gamay kay kung di ka gusto mo-ambak, kinahanglan maghinayhinay ka'g kanaog sa kilid. Kita ka ana? Hamis-hamis jud. Kinahanglan ka'g gamay nga spiderman powers aron dili ka ma-mu-mu, madakin-as ug maligid sa bakilid.

Kinahanglan pod kahibalo ka mulangoy o naa kay lifevest. Pero mas lingaw jud nga kahibalo mulangoy. Pagpraktis daan. Sa dagat. Naay gamay diperensya ang paglangoy sa dagat ug sa tubig tab-ang. Pero kung master naka kaya ra kaayu.

Cool ka? Naka-adto na ka sa Bugasok? Adto dayon! Sakay ug Ceres nga bus. Kana-og sa Argao. Sakay ug trisikle, pahatud sa Alex Cafe. Pangitaa si Ritchie. Mao na siya ang guide. Unya go na dayon mo!

Batirul

Nangita ko'g picture ug batirol kay maghisgot unta ko. Wala man! Palitrato unya ko'g batirol o! Unya makaila ra mo pohon.

Gimingaw ko'g sikolati da. Ug puto. Ug kalamay. sa Bohol.

Dugos!

Gitagaan ko'g usa ka botilya nga dugos sa akong amiga nga si Tess. Gikan pa jud to sa Pilipinas. Sus, gamay ra jud akong nakuha kay nibuto man ang botelya sa Tanduay nga gisuldan. Usika lagi! Mas lami raba to kay sa dugos nga Amerikano.